Rev 19 | BOJ | STEP | Onaqa laŋ goge dia tamo uŋgasari tulaŋ gargekoba naŋgi murqumyeqnabqa e naŋgo kakoro quem. Naŋgi murqumyoqnsib endegsib maroqneb, “Iga Qotei aqa ñam soq-toqnqom! Gago Qotei a segi na iga eleŋej. A ñam koba ti siŋgila ti unu.

Revelation of John 19

Babilon qure a tulaŋ padalougetej deqa tamo uŋgasari naŋgi Qotei aqa ñam soqtoqneb

1 Onaqa laŋ goge dia tamo uŋgasari tulaŋ gargekoba naŋgi murqumyeqnabqa e naŋgo kakoro quem. Naŋgi murqumyoqnsib endegsib maroqneb, “Iga Qotei aqa ñam soq-toqnqom! Gago Qotei a segi na iga eleŋej. A ñam koba ti siŋgila ti unu. 2 A kumbra tiŋtiŋ na tamo uŋgasari naŋgo kumbra qa naŋgi peginjreqnu. Agi a na sambala uŋa kobaquja awai tulaŋ ugedamu yqo. Uŋa dena aqa sambala kumbra na tamo uŋgasari kalil mandamq di unub qaji naŋgi ugeugeinjroqnej. Osiqa Qotei aqa wau tamo naŋgi dego ñumeqnaq moreŋoqneb. Aqa une deqa Qotei na a pegiyosiqa qalqo. Deqa iga aqa ñam soqtoqnqom!” Naŋgi degsib murqumyoqnsib maroqneb.

3 Osib naŋgi olo leleŋosib endegsib maroqneb, “Iga Qotei aqa ñam soqtoqnqom! Ŋamyuo na Babilon qure yusimqa aqa qurem bati gaigai oqoqnqas!” 4 Onaqa gate kokba 24 naŋgi ti wagme qolqe ŋambile so qaji naŋgi ti siŋga pulutosibqa Qotei awo jaram kobaq di awesoqnej qaji a qa louoqnsibqa maroqneb, “Bole. Iga Qotei aqa ñam soqtoqnqom!” 5 Onaqa Qotei aqa awo jaram koba jojomq dia tamo bei tigelosiq anjam bei marnaqa e aqa kakoro quem. A leleŋosiq endegsi marej, “Qotei aqa wau tamo niŋgi ti tamo uŋgasari Qotei qa ulaoqnsibqa aqa sorgomq di geregere unub qaji niŋgi ti tamo laŋaj ti tamo ñam ti kalil niŋgi Qotei aqa ñam soqtoqniye!”

Kaja Du aqa uŋa baŋ ojqa batiqo deqa aqa Abu Qotei na iŋgi koba goiqo

6 Ariya laŋ goge dia tamo uŋgasari tulaŋ gargekoba naŋgi koroosib murqumyoqnsib anjam mareqnabqa e naŋgo kakoro quem. Naŋgo anjam di ya kobaquja meli dosiq anjam ateqnu dego bul. Naŋgo anjam di kola aisiq anjam atobulqo. Naŋgi tulaŋ koba leleŋoqnsibqa endegsib maroqneb, “Iga gago Tamo Koba Qotei aqa ñam soqtoqnqom! Siŋgila kalil aqaq di unu deqa a bini Mandor Koba unu! 7 Bini iga Qotei qa tulaŋ areboleboleigoqnimqa aqa ñam soqtoqnqom. Di kiyaqa? Kaja Du na aqa uŋa baŋ ojqa bati brantqoqa aqa uŋa a walaosiqa aqa jejamu gereiyqo. 8 Qotei na a gara qat tulaŋ naimyo jigetqo. Gara di tulaŋ milalosiq suwaŋejunu.” Gara qat naimyo di agi kumbra bole tiŋtiŋ kalil Qotei aqa segi tamo uŋgasari naŋgi yeqnub qaji.

9 Onaqa laŋ aŋgro dena olo merbej, “Ni anjam endegsim neŋgreŋye, ‘Kaja Du aqa uŋa baŋ ojqa batiqo deqa aqa Abu Qotei na iŋgi koba goiqo. Goisiq aqa segi tamo uŋgasari naŋgi metnjrqo-qa iŋgi uyqa bonub. Bonub qaji naŋgi tulaŋ areboleboleinjrqas.’” Osiqa merbej, “Anjam endi Qotei aqa anjam bole.” 10 Laŋ aŋgro na e degsi merbonaqa e aqa areq di siŋga pulutosim a biŋiyqa laqnamqa a na merbej, “Ni e biŋibaim! E ni bul. E ni ti tamo kalil Yesus aqa anjam qa naŋgo areqalo siŋgilateqnub qaji naŋgi ti iga koba na wau qujai. Iga kalil was. Deqa ni Qotei segi biŋi-yoqnime. Iga qalie, Qotei aqa Mondor a na qujai Qotei aqa medabu o qaji tamo naŋgi qariŋnjreqnaqa naŋgi Qotei aqa anjam marsib laqnub. Deqa naŋgi Yesus aqa ñam dego marsib laqnub.”

Jon a tamo hos quraq di awesonaq unej

11 Onaqa e olo ŋam atsimqa laŋ waqonaqa hos qat bei brantonaq unem. Tamo hos quraq di awesoqnej qaji aqa ñam agiende, “Qotei aqa Wau Geregere Taqateqnu Qaji Tamo.” Aqa ñam bei, “Kumbra Bole Yeqnu Qaji Tamo.” A kumbra tiŋtiŋ na tamo uŋgasari naŋgo une qa peginjroqnsiqa naŋgi qoto itnjreqnu. 12 Aqa ŋamdamu ŋam puloŋ bul puloŋoqnej. Aqa gateq di gate tatal gargekoba atesoqnej. Gate tatal di mandor kokba naŋgi na ateqnub deqaji bul. Aqa jejamuq di ñam bei neŋgreŋyonab soqnej. Ñam di a segi qalie. Tamo bei ñam di qaliesai. 13 A gara olekoba dena kabuosiqa gara di leŋq di tuqtej. Aqa ñam endegsib mareqnub, “Qotei aqa Anjam.” 14 Onaqa e olo ŋam atem di qaja tamo tulaŋ gargekoba laŋ qureq dena hos segi segi osibqa hos quraq di awoeleŋosib Kristus dauryosib gileqnab unjrem. Hos naŋgi di qat kalil. Qaja tamo naŋgi di gara qat tulaŋ naimyo milalo jigeleŋesoqneb. 15 Kristus aqa medabuq na serie olekoba tulaŋ qala uge brantej. A serie di osimqa tamo uŋgasari sawa sawa kalilq di unub qaji naŋgi ñumeleŋqajqa deqa aqa medabuq na brantej. A bu toqoŋ ain na gereiyo qaji di dego ojsimqa dena tamo uŋgasari sawa sawa kalilq di unub qaji naŋgi siŋgila na taqatnjroqnsimqa wain gei parato qaji kulumq dia aqa siŋga waiysim wain gei paraparainjrqas. Kulum di agi Qotei siŋgila koba ti unu qaji aqa minjiŋ. 16 Kristus aqa gara olekobaqsi aqa qaloqsi ñam endegsib neŋgreŋyeb unu, “Mandor kokba kalil naŋgo Mandor Koba. Tamo kokba kalil naŋgo Tamo Koba.”

17 Ariya e laŋ aŋgro bei seŋq di tigelesonaq unem. A tulaŋ koba leleŋosiqa qebari kalil laŋ sorgomq di pururueqnub qaji naŋgi metnjrej, “Niŋgi bosib koroabqa Qotei na iŋgi koba atsim metŋgim niŋgi uyiye. 18 Mandor kokba ti qaja tamo naŋgo gate ti tamo siŋgila naŋgi ti tamo naŋgi hos quraq di awejunub qaji naŋgi ti naŋgo hos ti Kristus na ñumeleŋoqnimqa naŋgo qusa niŋgi bosib uyiye. Kaŋgal tamo naŋgi ti tamo naŋgi naŋgo segi wau ojeqnub qaji naŋgi ti tamo laŋaj ti tamo ñam ti kalil naŋgo qusa niŋgi bosib uyiye.”

19 Onaqa e olo ŋam atsimqa wagme juwaŋ a ti mandor kokba kalil mandamq di unub qaji naŋgi ti naŋgo qaja tamo ti naŋgi bosib koroesonab unjrem. Naŋgi na tamo hos quraq di awesoqnej qaji aqa qaja tamo naŋgi ti qoto itnjrqa marsibqa deqa koroesoqneb. 20 Ariya tamo hos quraq di awesoqnej qaji a na wagme juwaŋ wo Satan aqa gisaŋ anjam maro tamo wo naŋgi aiyel ŋambile sonab ojsiqa wainjrnaq ŋamyuoq aieb. Ŋamyuoq dia meniŋ kalil yusiq ñaŋgaeqnu. Satan aqa gisaŋ anjam maro tamo di nami wagme juwaŋ aqa ŋamgalaq dia maŋwa tulaŋ kokba yoqnej. Aqa kumbra dena a na tamo uŋgasari wagme juwaŋ aqa toqor osib aqa sulum biŋiyoqneb qaji naŋgi gisa gisaŋnjroqnej. 21 Onaqa tamo hos quraq di awesoqnej qaji a na serie olekoba aqa medabuq dena brantej qaji di osiqa mandor kokba naŋgo qaja tamo naŋgi di ñumeqnaq moreŋoqneb. Onaqa qebari kalil naŋgi bosib qaja tamo naŋgo qusa uynab mene diqnjrej.